இலங்கையை சேர்ந்த ஐஎஸ்ஐஎஸ் பயங்கரவாதிகள் நால்வர் இந்தியாவில் கைது
அண்மையில் தொடர்ச்சியாகவே குஜராத்தில் கடல் வழியாக போதைப் பொருள்கள் கடத்தி வரப்படும் சம்பவங்கள் அரங்கேறி பரபரப்பை ஏற்படுத்தி இருக்கும் நிலையில் ஐஎஸ்ஐஎஸ் தீவிரவாத அமைப்பைச் சேர்ந்த 4 பயங்கரவாதிகள் கைது செய்யப்பட்டுள்ளது மீண்டும் குஜராத்தில் பரபரப்பை ஏற்படுத்தியுள்ளது.
இலங்கையைச் சேர்ந்த ஐஎஸ்ஐஎஸ் பயங்கரவாதிகள் நான்கு பேரை கைது செய்திருப்பதாக குஜராத் பயங்கரவாத தடுப்பு பிரிவு அறிவித்துள்ளது.
அகமதாபாத்தில் உள்ள சர்தார் வல்லபாய் பட்டேல் விமான நிலையத்தில் வைத்து நான்கு பயங்கரவாதிகளும் கைது செய்யப்பட்டுள்ளனர். கைது செய்யப்பட்ட நான்கு பேரும் இலங்கையில் இருந்து சென்னை வழியாக அகமதாபாத் வந்துள்ளனர்.
பின்னர் அங்கிருந்து பாகிஸ்தானுக்கு சென்று அந்நாட்டு தயாரிப்பு ஆயுதங்களை வாங்குவதற்கென தங்களை தயார் செய்துகொண்டிருந்த நிலையில் அவர்கள் கைது செய்யப்பட்டுள்ளதாக தகவல்கள் வெளியாகி உள்ளது.
