யாழில் இராணுவ வாகனம் மோதி யுவதி பலி, இராணுவ சிப்பாய் விளக்கமறியலில்
யாழ்ப்பாணத்தில் புத்தூர் பகுதியில் இராணுவ வாகனம் மோதி யுவதி உயிரிழந்த சம்பவம் தொடர்பில் சாரதியான இராணுவ சிப்பாய் விளக்கமறியலில் வைக்கப்பட்டுள்ளார்.
புத்தூர் – கனகம்புளியடி வீதியில் வீரவாணி சந்தியில் நேற்று திங்கட்கிழமை (20) இராணுவத்தினருக்கு சொந்தமான ஹயஸ் ரக வாகனம் வீதியோரமாக, வீதியை கடக்க துவிச்சக்கர வண்டியுடன் காத்திருந்த யுவதியை மோதியதியில் யுவதி உயிரிழந்திருந்தார்.
வாதரவத்தை பகுதியை சேர்ந்த 23வயதிடைய சுதாகரன் சாருஜா என்பவரே தனது 23ஆவது பிறந்ததினமான நேற்றைய தினம் விபத்தில் உயிரிழந்திருந்தார்.
சம்பவம் தொடர்பில் விசாரணைகளை முன்னெடுத்த அச்சுவேலி பொலிஸார் , வாகன சாரதியான இராணுவ சிப்பாயை கைது செய்து விசாரணைகளை முன்னெடுத்திருந்தனர்.
விசாரணைகளின் பின் இராணுவ சிப்பாயை மல்லாகம் நீதிமன்றில் முற்படுத்திய போது , சிப்பாயை 29ம் திகதி வரையில் விளக்கமறியலில் வைக்க மன்று உத்தரவு பிறப்பித்தது.
குறித்த இராணுவ வாகனத்தில் இராணுவ உயர் அதிகாரிகள் பயணித்ததாகவும் , அவர்களில் இருவர் காயமடைந்த நிலையில் பலாலி வைத்தியசாலையில் சிகிச்சைக்காக அனுமதிக்கப்பட்டுள்ளதாக கூறப்படுகிறது.
