யாழில் வங்கியில் வேலை பெற்று தருவதாக 15 இலட்சம் வாங்கிய முகாமையாளர் கைது
வங்கியில் வேலை பெற்று தருவதாக கூறி 15 இலட்ச ரூபாய் பணத்தினை மோசடி செய்த குற்றச்சாட்டில் வங்கி ஒன்றின் முன்னாள் முகாமையாளர் கைது செய்யப்பட்டுள்ளார்.
யாழ்ப்பாணத்தை சேர்ந்த இளைஞன் ஒருவருக்கு , தான் கடமையாற்றிய வங்கியில் வேலை வாய்ப்பினை பெற்று தருவதாக கூறி 15 இலட்ச ரூபாய் பணத்தினை பெற்றுள்ளார்.
பணத்தினை பெற்று நீண்ட காலமாகியும் வேலை வாய்ப்பினை பெற்று கொடுக்காததால் , இளைஞன் பணத்தினை மீள கோரியுள்ளார். அதனால் முன்னாள் முகாமையாளர் 15 இலட்ச ரூபாய் பணத்திற்கான காசோலையை வழங்கியுள்ளார்.
காசோலையை இளைஞன் வங்கியில் வைப்பிலிட்ட போது , காசோலை திரும்பியுள்ளது. அதை அடுத்து இளைஞன் யாழ் . மாவட்ட குற்றத்தடுப்பு பொலிஸ் பிரிவிடம் முறையிட்டுள்ளார்.
முறைப்பாட்டின் பிரகாரம் பொலிஸார் மேற்கொண்ட விசாரணைகளில் , முன்னாள் முகாமையாளர் தலைமறைவாகி இருந்தார்.
அந்நிலையில் தொடர் விசாரணைகளை மேற்கொண்டு வந்த பொலிஸார் நேற்றைய தினம் சனிக்கிழமை அவரை கைது செய்து , பொலிஸ் நிலையத்தில் தடுத்து வைத்து விசாரணைகளை முன்னெடுத்துள்ளனர்.
