அடிக்கடி வெடிக்கும் சிலிண்டர்கள் தொடர்பில் லிற்றோ நிறுவனம் தகவல்!
தரம் குறைந்த எரிவாயு கொள்கலன்கள் சந்தையில் விற்பனை செய்யப்படுவதாக சுமத்தப்படும் குற்றச்சாட்டுக்களில் உண்மையில்லை என லிற்றோ எரிவாயு நிறுவனம் அறிவித்துள்ளது.
திரவ பெற்றோலிய வாயு உள்ளடக்கத்தில் எவ்வித மாற்றமும் செய்யப்படவில்லை என அந்த நிறுவனம் சுட்டிக்காட்டியுள்ளது.
இறக்குமதி செய்யப்படும் எரிவாயு தொடர்பில் சர்வதேச சுயாதீன ஆய்வுகூட அறிக்கை பெற்றுக் கொள்ளப்படுவதுடன், உள்நாட்டிலும் ஆய்வுகூட பரிசோதனைகள் மேற்கொள்ளப்படுகின்றது என தெரிவித்துள்ளது.
அண்மையில் குதிரை பந்தய திடலில் ஹோட்டல் ஒன்றில் எரிவாயு கசிவு ஏற்பட்டு வெடிப்புச் சம்பவம் இடம்பெற்றிருந்தது.
இந்த நிலையில் குறித்த ஹோட்டலுக்கு தமது நிறுவனம் எரிவாயு விநியோகம் செய்யவில்லை எனவும் தெரிவித்துள்ளது.
எரிவாயு கொள்கலன் விபத்துக்களில் அநேகமானவை எரிவாயு ஹோஸ் (குழாய்) மற்றும் எரிவாயு அடுப்பு ஆகியவற்றின் குறைபாடுகளால் நிகழ்ந்துள்ளதாகவும், எரிவாயுவின் தர குறைவினால் விபத்துக்கள் இடம்பெறவில்லை எனவும் குறிப்பிடப்பட்டுள்ளது.
எரிவாயு கொள்கலன் ஒன்றால் அதில் அடைக்கப்படுகின்ற எரிவாயுவின் அளவினை போன்று ஆறு மடங்கு அழுத்தத்தினை தாங்கி கொள்ள கூடிய இயலுமை உண்டு எனவும் தெரிவித்துள்ளது.
எனவே சந்தையில் விநியோகிக்கப்படுகின்ற எரிவாயு கொள்கலன்களால் ஆபத்து ஏற்படுமென பரவி, தகவல் உண்மைக்கு புறம்பானது எனவும் லிற்றோ நிறுவனம் அறிவித்துள்ளது.
இலங்கையில் விற்பனை செய்யப்படுகின்ற எரிவாயு சிலிண்டர்களால் உள்ளடக்கப்படுகின்ற எரிவாயு தரமற்றது எனவும் நுகர்வோர் பாதுகாப்பு அதிகார சபையின் பிரதி நிறைவேற்று அதிகாரியாக முன்னர் இருந்த துசான் அண்மையில் குற்றம் சுமத்தியிருந்தார் என்பது குறிப்பிடத்தக்கது.
