இந்தியாவுக்கு எதிரான டெஸ்ட்: 2ம் நாள் முடிவில் நியூசிலாந்து அணி 180/3
இந்தியா மற்றும் நியூசிலாந்து அணிகளுக்கிடையிலான முதலாவது டெஸ்ட் போட்டி பெங்களூருவில் நடைபெற்று வருகிறது. இதில் டாஸ் வென்ற இந்திய அணி முதலில் பேட்டிங்கைத் தேர்வு செய்தது. இந்திய அணியின் தொடக்கமே சரியாக அமையாமல், பல்வேறு விக்கெட்டுகளை சீரான இடைவெளியில் இழந்தது. முக்கியமாக, 5 இந்திய வீரர்கள் டக் அவுட் ஆகி வெளியேறினர், இதில் அதிகபட்சமாக ரிஷப் பண்ட் 20 ரன்கள் எடுத்தார்.
நியூசிலாந்து பந்து வீச்சாளர்கள் சிறப்பாக பந்து வீசி இந்திய அணியை விரைவாக சுருக்கினர். ஹென்றி 5 விக்கெட்டுகளையும், வில்லியம் ஓரோர்கே 4 விக்கெட்டுகளையும் வீழ்த்தி இந்தியாவின் பேட்டிங் வரிசையை பலியாக்கினர்.
அதனைத் தொடர்ந்து, நியூசிலாந்து அணியின் தொடக்க வீரர்களாக கான்வே மற்றும் லாதம் களமிறங்கினர். நிதானமாக விளையாடிய லாதம் 15 ரன்னில் ஆட்டமிழந்தார். அதிரடியாக விளையாடிய கான்வே, அரைசதம் அடித்து அணிக்கு சிறந்த தொடக்கத்தை வழங்கினார்.
நீண்ட நேரமாக விக்கெட்டை எடுக்க முடியாமல் திணறிய நிலையில், ஜடேஜா பந்து வீசியபோது வில் யங் 33 ரன்னில் ஆட்டமிழந்தார். பின்னர், கான்வே 91 ரன்னில் வெளியேறினார். இதனைத் தொடர்ந்து, ரச்சின் ரவீந்திரா மற்றும் டேரில் மிட்செல் ஜோடி சேர்ந்து நிதானமாக விளையாடி ரன்களை சேர்த்து வந்தனர்.
இரண்டாம் நாள் ஆட்ட நேர முடிவில், நியூசிலாந்து அணி 180/3 என்ற நிலைமையில் உள்ளது. ரவீந்திரா 22 ரன்னிலும், மிட்செல் 14 ரன்னிலும் களத்தில் இருக்கின்றனர்.
இந்திய அணியின் பந்துவீச்சில் அஸ்வின், ஜடேஜா, மற்றும் குல்தீப் யாதவ் தலா ஒரு விக்கெட்டை வீழ்த்தியுள்ளனர். நியூசிலாந்து இப்போது 134 ரன்கள் முன்னிலையில் உள்ளது, இந்த நிலையில், இந்தியா மூன்றாம் நாளில் விக்கெட்டுகளை விரைவாக வீழ்த்த வேண்டிய கட்டாயத்தில் உள்ளது.
