பாடசாலை மாணவனை பாலியல் துஷ்பிரயோகம் செய்த ஆசிரியருக்கு விளக்கமறியல்
9 வயது பாடசாலை மாணவனை பல முறை பாலியல் துஷ்பிரயோகம் செய்ததாகக் கூறப்படும் ஆசிரியரை எதிர்வரும் 27 ஆம் திகதி வரை விளக்கமறியலில் வைக்குமாறு சம்மாந்துறை நீதிவான் நீதிமன்றம் நேற்று வியாழக்கிழமை (13) உத்தரவிட்டுள்ளது.
இந்த சம்பவம் அம்பாறை மாவட்டம் சம்மாந்துறை பொலிஸ் பிரிவிற்குட்பட்ட புற நகர் பகுதி ஒன்றில் உள்ள பாடசாலை ஒன்றில் இடம்பெற்றுள்ளது.
பாலியல் துஷ்பிரயோகத்திற்கு உள்ளான பாடசாலை மாணவனின் பெற்றோரினால் வழங்கப்பட்ட முறைப்பாட்டின் அடிப்படையில் மேற்கொள்ளப்பட்ட விசாரணையில் சந்தேக நபரான 38 வயதுடைய ஆசிரியர் கைது செய்யப்பட்டுள்ளார்.
சந்தேக நபர் குறித்த பாடசாலை மாணவனைப் பாடசாலையின் மலசலக் கூடத்திற்கு அழைத்துச் சென்று பலமுறை பாலியல் துஷ்பிரயோகம் செய்துள்ளதாக முறைப்பாட்டில் குறிப்பிடப்பட்டுள்ளது.
பாலியல் துஷ்பிரயோகத்திற்கு உள்ளான பாடசாலை மாணவன் சம்மாந்துறை ஆதார வைத்தியசாலையில் சிகிச்சைக்காக அனுமதிக்கப்பட்டுள்ளதுடன் மேலதிக விசாரணைகளை சம்மாந்துறை பொலிஸார் மேற்கொண்டு வருகின்றனர்.
