நடிகர் நகுல் நடிக்கும் ‘டார்க் ஹெவன்’ படத்தின் காணொளி வெளியீடு
‘நாக்க முக்க’ புகழ் நடிகர் நகுல் முதன்மையான கதாபாத்திரத்தில் நடித்துள்ள ‘டார்க் ஹெவன்’ திரைப்படத்தின் அறிமுக காணொளி வெளியிடப்பட்டுள்ளது. ‘D3’ இயக்கிய பாலாஜி இயக்கத்தில் உருவாகியுள்ள இப்படத்தில் நகுல், சரண், டேனி தயாள், அலெக்ஸ், கோதை சந்தானம் உள்ளிட்ட பலர் நடித்துள்ளனர். ஒளிப்பதிவை பி.கே. மணிகண்டன் மேற்கொண்டுள்ள அதேவேளை, இசையை சக்தி பாலாஜி அமைத்துள்ளார்.
கோதை என்டர்டெய்ன்மென்ட் மற்றும் எஸ். எம். மீடியா ஃபேக்டரி ஆகிய நிறுவனங்கள் இணைந்து தயாரித்துள்ள இப்படத்தின் படப்பிடிப்பு நிறைவடைந்து தற்போது படத்தொகுப்பு போன்ற பிந்தைய தொழில்நுட்ப பணிகள் விறுவிறுப்பாக நடைபெற்று வருகின்றன.
சென்னையில் நடந்த பிரத்யேக நிகழ்வில் அறிமுக காணொளி வெளியிடப்பட்டது. இயக்குநர் பாலாஜி இந்நிகழ்வில் பேசுகையில், “‘காந்தாரா’ படத்திற்கு பிறகு, தமிழக தென் பகுதி மக்களின் நம்பிக்கைக்கு உரிய நாட்டார் கதைகளை தழுவி புலனாய்வு திரில்லர் வகையில் ‘டார்க் ஹெவன்’ உருவாக்கப்பட்டுள்ளது” என்றார்.
இந்த திரைப்படத்தில் நகுல் ஒரு புலனாய்வு காவல்துறை அதிகாரியாக நடிக்கிறார், இது அவருக்கு புதுமையான அனுபவமாகும்.
