முன்னாள் ஜனாதிபதிகளின் பாதுகாப்பு குறித்து விளக்கமளித்த அரசாங்கம்!
முன்னாள் ஜனாதிபதிகளின் பாதுகாப்பிற்காக ஒதுக்கப்பட்டுள்ள நிதி, அனைத்து பொலிஸ் அதிகாரிகளுக்கும் மருந்து வழங்குவதற்காக ஒதுக்கப்பட்டுள்ள நிதியை விட அதிகம் என்று அமைச்சர் விஜித ஹேரத் தெரிவித்தார்.
அரசாங்க தகவல் திணைக்களத்தில் நேற்று (06) நடைபெற்ற ஊடகவியலாளர்களுடன் உரையாடும் போது, அவர் இந்த தகவலை பகிர்ந்தார். முன்னாள் ஜனாதிபதிகளின் பாதுகாப்பு செலவின்மூலம், 100க்கும் மேற்பட்ட பொலிஸ் மற்றும் படை அதிகாரிகள் பணியில் ஈடுபடுத்தப்பட்டுள்ளதுடன், சில முன்னாள் ஜனாதிபதிகளுக்கு 180 பேர் வரை பாதுகாப்பு அதிகாரிகள் நியமிக்கப்பட்டுள்ளனர்.
இது மட்டுமன்றி, பாதுகாப்பு வாகனங்கள், பஸ், டிபன்டர், முச்சக்கர வண்டிகள், மோட்டார் சைக்கிள்கள், மற்றும் அம்பியூலன்ஸ் போன்றவை வழங்கப்பட்டுள்ளன. இந்த ஒவ்வொரு நடவடிக்கைக்காக சராசரியாக 1,100 மில்லியன் ரூபா செலவிடப்படுவதாக கணக்கிடப்பட்டுள்ளது.
இந்த செலவினம், பொலிஸ் வைத்தியசாலையின் ஒரு வருடத்திற்கான செலவினை விட அதிகமாகும் என அவர் குறிப்பிட்டார். இதனால், எதிர்காலத்தில் முன்னாள் ஜனாதிபதிகளின் பாதுகாப்பு முறைகளை மாற்ற வேண்டுமெனவும், அதற்காக குழுவொன்று நியமிக்கப்பட்டுள்ளது என்றும் அமைச்சர் கூறினார்.
அந்த குழுவின் சிபாரிசின்படி, முன்னாள் ஜனாதிபதிகளுக்கான சலுகைகள் மற்றும் பாதுகாப்பு முறைகளை மீண்டும் பரிசீலனை செய்ய நடவடிக்கை எடுக்கப்படும் என்றும் அவர் அறிவித்தார்.
